رحلة في طريق

رحلة في طريق



جمعت ناس وناس



كل واحد في احواله



تفكيرة محتاس



تبص ع العيون



تلاقيها بتبصلك



لكن مش شايفاك



سارحة في ملكوت تاني



يمكن عليك النني صحيح



لكن الفكر في عالم تاني



تحاول تكلمهم



تلاقي الكلمة طالعه منهم



ما لها طعم ولا معنى



كلمة بحروف تايهه



بحروف مفقودة



بيقولها بشفايف فقدت الضحكة



وان فضلت ترسم بسمة موجوده



تايهه جواهم المعاني



تايهه رايحة بعيد



كل واحد



تحس على جبينه



مليون خط....



شقى وتعب



وكل ثانيه هم جديد



لكن عايش



والحياة ماشيه



والدنيا مش واقفه



ولا هتقف عليه



ايه يعني واحد



مش حاسه الدنيا بيه



ايه يعني ينام



والصبح يطلع مش يلاقيه



هتفرق كتير ...؟



مش هتفرق...



راح واحد



جاي غيره



بنفس همه هيشيله



بنفس الملامح هيعيش



يمكن حد يشوفه



يحس بيه في يوم



لكن ابدا ما هيفكر



انه حاسس قد ايه



مظلوم



مهو كمان نفسه يعيش



نفسه يوم مش يقف



في طابور عيش



نفسه يركب تاكس



مش اتوبيس



ولما يركب



يلاقي مكان يرتاح فيه



يبص من الشباك



ويحلم ببكرة



اللي جاي ايه

....