رباعيات براءة جميلة

رباعيات براءة جميلة ( 1 )

دنيا الأمان فيها بقى عدم
والطيب فيها بينداس بالجزم
ولو قال كفاية ظلم يا بشر
تاني يوم تدور تلاقيه اتعدم 

دنيا بقت غابة الكل بينهش في التاني
وقليل اوي لو لقيت قلب مهوش أناني
كترت الضحايا واتجْبَّر الظلم وفَجَر
يقتل ويدبح وينادي بعلو صوته مين تاني  

 كلمة الحق صوتها ضعيف مكتوم
والظلم قوي وبـ يزيد يوم عن يوم
يا ظلم مسيرك تلاقي اللي يظلمك
دا ربنا كبير ومفيش حال بـ يدوم 

 يا دنيا وديتي الأمان فين اتكلمي
لا سند فيكِ يا دنيا ولا ضهر يحمي
بقى كل شيء فيكِ للكلاب مباح
حتى العرض مبقاش عليه حد يبكي 

 
بنندب حظنـــــا وحظها ولا بننعيهــا
بنشرب مُـ ـرها ليه والشـهـــد ماليها
ذنب مش ذنبها وبنجيب العتب عليها
مهي دي بلدنا أمنـــــا اللي منها جينا
وفي ترابها هنندفن اللي عليه اتربينا
بنلف بلاد الدنيا ولا في امان إلا فيها  

 

كتر الفلوس في ايدين الابن بتفســد
وبدل ما تبني جيل تلاقي نفسك بتهد
بس الكلام دا مش تعميم على الـكل
طالمــا في أســــاس تربــــوي بجــد

 

 يمكن يكون الخير في نظر بعض الناس قل
لكنه موجـــــود ووفيـــــــر في نظر غيرهم
كـــل واحــــد بـ ينظر بعينه وصفاتــه للكـــل
وباللي جـــــواه وحاسه بيحكم على افعالهم

 

 دنيا عجيبه وفيها العجب ملوش حدود
من زمـــان اوي قبل جــدود الجــدود
وكل ما نقــول زمن العجــايب انتهى
تلاقي نطت عجيبة وتقول لا موجـود