اتغربت عنك يا أمي
وشايله روحك في دمي
بتصبرني في غربتي
لما ارجعلك يا أمي
شفت كتير من البشر أصناف
ناس بتحبك وناس عليكِ بتخاف
وناس لو يوم الفجر فيكِ اختفى ما يهمها
وناس بعيدة وسايبه معاكِ روحها وقلبها
وحتى ابنك اللي بيعاتب عتاب جارح
دايما بفكره وقلبه وروحه فيكِ سارح
بتخونه الحروف ساعات ويخونه نطقها
وأول ندا منك يجري لحضنك يبكي وينوح
ويقولك سامحيني يا أمي أفديكِ بالروح
لسه الخير جواه يا أمي
ولسه روحك ساكناه
ومين يقدر يغفر ويسامح أي هفوة
إلا سماح الأم لابنها
تبتسمي وتضحكي وبقلبك تضميه
ضمة حبايب قلوبهم جواكِ مستنياه
يرجع بلهفة وشوق وبعيونهم تتلقاه
ولو يوم رجع ملقاش صورته في العيون
مش من حقه يلومك ولا ليكِ يخون
ما هما بشر زيه تمام
من حقهم يلاقوا صورتهم في عيونه كمان
ليست هناك تعليقات:
إرسال تعليق